خیبر پختونخوا؛ پولیس آپریشن میں انتہائی مطلوب دہشتگرد کمانڈر سیف اللہ مارا گیا

باڑہ شیخان کے علاقے میں پولیس کارروائی کے دوران فتنۃ الخوارج کا انتہائی مطلوب کمانڈر سیف اللہ مارا گیا، مقابلے میں 2 پولیس اہلکار معمولی زخمی ہوئے جنہیں ابتدائی طبی امداد فراہم کردی گئی۔ پولیس کے مطابق ہلاک دہشت گرد کمانڈر سیف اللہ کالعدم ٹی ٹی پی سے وابستہ تھا اور پولیس و سی ٹی ڈی کو متعدد سنگین مقدمات میں مطلوب اشتہاری تھا۔ وہ گرفتاری کے خوف سے گزشتہ 3 سال سے افغانستان میں مقیم تھا اور حال ہی میں دہشت گردوں کی ایک تشکیل کا کمانڈر مقرر ہوکر دہشت گردی کی غرض سے پاکستان آیا تھا۔ سی ٹی ڈی ریکارڈ کے مطابق ہلاک دہشت گرد میدانک کے علاقے میں سیکیورٹی چیک پوسٹوں پر متعدد براہ راست حملوں سمیت جمرود کے علاقے علی مسجد میں آئی ای ڈی دھماکوں میں بھی ملوث تھا۔ پولیس کے مطابق کارروائی کے دوران دہشت گرد کی جانب سے گرینیڈ حملہ کیا گیا، جس کے نتیجے میں 2 پولیس اہلکاروں کو معمولی خراشیں آئیں۔ انسپکٹر جنرل آف پولیس خیبرپختونخوا ذوالفقار حمید نے انتہائی مطلوب دہشت گرد کمانڈر کو ہلاک کرنے پر خیبرپختونخوا پولیس کے جوانوں کی تعریف کرتے ہوئے انہیں شاباش دی۔ انہوں نے کہا کہ بہترین کارروائی کے دوران خارجی کمانڈر کو ہلاک کرکے سیکڑوں معصوم جانوں کو بچانے والے پولیس اہلکار قوم کا اثاثہ ہیں۔ آئی جی خیبرپختونخوا پولیس نے مزید کہا کہ پاک سرزمین کو آخری دہشت گرد سے پاک کرنے تک آپریشنز اور کارروائیوں کا سلسلہ جاری رہے گا۔