امریکا میں فضائی ٹریفک کنٹرول کے نظام میں تکنیکی خرابی کے باعث ملک بھر کے ہوائی اڈوں پر پروازوں کی روانگی روک دی گئی جس سے ہزاروں پروازیں متاثر ہوئیں۔ امریکی فیڈرل ایوی ایشن ایڈمنسٹریشن (ایف اے اے) کے مطابق خرابی سے ریڈار اور ایئر ٹریفک کنٹرول کی صلاحیت متاثر ہوئی جبکہ امریکا آنے والی بین الاقوامی پروازوں کا الگ الگ جائزہ لیا جائے گا۔ حکام نے تاحال گراؤنڈ اسٹاپ ختم ہونے کا وقت نہیں بتایا۔ امریکی میڈیا کے مطابق فضائی نظام پر سائبر حملے یا تخریب کاری کی سرکاری تصدیق نہیں ہوئی۔ ایف اے اے کے تکنیکی ماہرین خرابی کی تحقیقات کر رہے ہیں جبکہ ایف بی آئی نے بھی معاملے کی تحقیقات شروع کردی ہیں۔ ہوم لینڈ سکیورٹی چیف مارک وین مولن نے کہا ہے کہ عوام کو خوفزدہ ہونے کی ضرورت نہیں، تمام پروازوں کا ریکارڈ موجود ہے اور ایئر ٹریفک کنٹرول مراکز میں مواصلاتی خرابی کے باعث پروازیں روکی گئیں۔ صدر ڈونلڈ ٹرمپ کو بھی صورتحال سے آگاہ کردیا گیا ہے۔ دوسری جانب امریکی محکمہ موسمیات کو بھی ملک گیر انٹرنیٹ اور مواصلاتی نظام میں خرابی کا سامنا ہے جس کے باعث ویب سائٹس پر موسمی معلومات تک رسائی متاثر ہوئی ہے۔ حکام کا کہنا ہے کہ تکنیکی ماہرین خرابی دور کرنے میں مصروف ہیں۔